ارفف من الكرتون

ارفف منتسوري من كرتون
الأدوات
كرتونة شاشة
مشمع لزق "باركية"
وعملة مسند للرف الاول من ورا حاجز خشب كان عندي
و قطعة فلين كانت داخل الكرتونة "حطيت فيها الكتب الخاصة بالانشطة"
ولزقتهم بمسدس الشمع

الكتاب التفاعلي

السلام عليكم ورحمة الله وبركاته
دا الكتاب التفاعلي اللي عملته لابني "سنة واربع شهور"
وحبه انوه ان الكتاب الغرض منه مش الفن لان دي مش موهبتي اصلا
لكن دا لاسباب تربوية كتير .. منها:
1-ربط ابني بالكتاب وحب الكتب والعلم
2-بداخل الكتاب انشطة لتقوية الانامل ولماساعدته على التحكم في ايده وتقوية قبضة ايده
3-لمعرفة اجزاء الوجه
4-لمعرفة اليد والاصابع
5-لمعرفة اسماء واصوات حيوانات المزرعة .. والسمك والبحر

المواد المستخدمة
1-الفوم
2-اشكال جهزه جوخ "الحمامه والارنب والدولفين"
3-وش عروسة قديمة عندي
4-بعض قصاصات القماش اللي عملت بيها الجيوب والسلة

ملاحظة:
الكتاب دا حاجه اختيارية .. يعني لو مش حبه تعملي الكتاب او مش عندك وقت ممكن تعملي النشاط اللي داخل الكتاب منفصل


‹

›

30‏/3‏/2016

10 صور - عرض الألبوم

العاب يدوية

الاولى مرور الكورة في النفق وخروجها من الجه الاخرى "بس انا استخدمت اسطوانات خشبية"
استخدمت ضهر كرتونه صغيره ولزقت عليه رول منديل مغلف بمشمع شبه البركيه
وغلفت الكرتونه نفسها بنفس المشمع
وتحتها حطيت علبة تلاجة عشان المجسمات تقع فيه
نشاط حركي دقيق
اللعبة الثانية لعبة تتبع الكورة
واستخدمت كرتونه ولزفت بالشمع طرق منحنيه وحطيت تحتها دعمات ترفعها شويه ومن الجوانب حطيت زجاجة مياه بلاستك "قصيتها نصين وفي كل جزء حطيت نص عشان الكوره ماتخرجش برا"
وفي الاخر حطيت طبق بلاستيك صغير عشان الكوره تستقر فيه
نشاط حسي بصري
تميم:سنة واربع شهور

30‏/3‏/2016

صورتان (2) - عرض الألبوم

بوكس كتب صغير

عملت لابني بوكس صغير للكتب‏‎
فكرته بسيطة جدا وسهلة
كان عندي بوكس فيبر بتاع تورتة ايس كريم .. لفيت عليه اسكرف مش بستخدمة .. وحطيت في ارضيته قماشة زي فرو كدا كانت فرشة لعلبة كاسات عندي ‏
ولزقتهم بالشمع وحطيت عليهم استيكر ‏‎
والحمد لله بقى عندنا بوكس كتب 

‹

›

30‏/3‏/2016

3 صور - عرض الألبوم

أنا وطفلي نستمتع بالمطبخ

أخيرا وبعد رحلة شقاء
"أنا وطفلي نستمتع بالمطبخ ‏‎
زي كل أم دخول المطبخ بطفلك يعتبر تحدي كل يوم. ‏‎. مابين انك عارفة إن المطبخ مفيد ليه لأنه هيمر بتجارب كتير وهيستفيد جدا."المطبخ كنز للطفل" ... وبين الدربكة وفتح الادراج وتخريج كل حاجة منها وبعدين زن عشان زهق فيفتح الارفف وينزل بردو كل حاجة منها.. ولو فتحت التلاجة وسهيت يبقى قولي عليها يا رحمن يارحيم ‏‎
مش هطول اكتر من كدا
في كام حاجه اما عملتها هدت الموضوع وخلته منظم اكتر.. مافيش زن بالعكس مستمتع وسعيد.. وانا بنجز اكتر.. وفي هدؤ وضحك واستمتاع.
1- كل حاجة بحطها على النار بطلعه على كرسي جمبي وابدأ اشرحها ليه " دي مكرونه .. هنحط المكرونة في الماية السخنة عشان تستوي وناكلها.. دي شعرية .. بنحمر الشعرية .. الله لونها بقى جميل .. وهكذا" وبخليه يقلب معايا وانا مسكاه..
طبعا هنا في اكتر من فايدة "بيتعلم عدد كبير من الكلمات .. بيشوف تجارب كتير زي تغير لون الشعريه والمكرونه لما تتحط في الصلصه .. البسلة والالوان المختلفة مع الجزر والبطاطس .. البطاطس المشوية وتجولها لما يشبه العجين .. الشعور بالحرارة في الحاجات اللي على البوتجازعكس اللي طالع من التلاجة "طبعا الحرص على امان الطفل وعد تعرضه للنار بشكل مباشر"... تقوية راحة اليد اثناء محاولة التقليب .. وغيرهم كتبر".
2- في حماله كنت جيبها عشان اصفي عليها الكوبيات .. شلت الاعمدة وبخليه هو يرجع يحطها.. دا طبعا بيساعدة على التركيز اكتر.. وبيخلية يتحكم في ايده واصابعة.. بتعمل تأزر حركي بصري..تقوية الأنامل استعدادا للكتابة فيما بعد بإذن الله.
3- بحطله الكوبايه اللي بتتفكك .. بيلعب بيها انه يقعد يقفلها ويفتحها.. او بنفكها خالص ويحاول يدخلها في بعض.. طبعا هنا بردو بتساعد على التركيز.. بعرفة الفرق بين "كبير وصغير".
4-المعالق الخشب يحطها ويشلها تاني.. ودي برده بتساعده على التركيز.. والتحكم في ايده .. الا جانب معرفة ملمس الخشب المختلف عن ملبس الاشياء الاخرى في المطبخ.
5- انا عندي حوضين.. بقفل واحد بالسداده واحطله حاجات مختلفة فيه.. بيستمتع جدا بالعبة دي ‏‎heart‎‏ رمز تعبيري .. وبنتعلم منها حاجات كتير بردو.. الفرق بين دافي وساقع "الماء مره بدفيها ومره بنزل الساقعة بس"... بنحط حاجات تتطفو وحاجات تنغمر... ممكن نحط بنجر او اي حاجه تغير اللون ونشوف التغير دا تدرجيا... ممكن نجيب سمكه او بطه ونعومها ونبدأ ندرجله مفهوم البحر "الله بطه بتعوم في البحيرة.. بطة بتقول ايه وهي بتستحمى.. ونحكي قصة عن البطة"
وهكذا اصبح الامر افضل بكثير بفضل الله.. المطبخ أصبح مكان لمزيد من الأنشطة الممتعه والمفيدة.. وانا اصبحت استطيع اثناء إنشغاله بالنشاط انجاز المزيد من مهام المطبخ مع متابعته وتشجيعه والاستمتاع معه
تميم : سنة و اربع شهور

‹

›

30‏/3‏/2016

4 صور - عرض الألبوم

صلصال منزلي

مين فينا مش بيحب الصلصال من وهو صغير... ومين فينا ابنه مش بيحب يلعب بالصلصال
وطبعا كل ام ابنها اصغر من 3 سنين مش بتحب تجيب صلصال من بره عشان مش يحطوا في بقه وكله اللوان صناعيه
عشان كده جبتلكم طريقة "الصلصال المنزلي"

الطريقة:
كوبيتين دقيق
-1/2 كوباية ملح
-كوباية مايه مغليه
-3معالق زيت
-3 معالق ملح ليمون
_عشان يبقى رحتها حلوه يا تحطي معلقة زيت عطري يا اما زي تحطي "قرفه"
الوان اكل.. او لو مش متوفر عندك ممكن تخلطي بنجر في الخلاط وتحطيه في كوباية المايه المغليه وتقلبي كويس وبعدين بالمصفي وتصفيه على العجينه.. وممكن تقسمي العجينه اتنين وتحطي على وحده بنجر اكتر من التانيه بحيث يبقى عندك احمر وبينك... ممكن كمان تضيفي كركم على جزء مع البنجر هيدي لون مختلف.. وابدعي لو عندك افكار تانيه

انا جربته وعملت بألوان الاكل "احمر وازرق واخطر واصفر واورنج وما يشابه الاسود"

ولفتهم في استرتش وحطتهم في التلاجة لحد ما يصحى تيمو وافجأة

ملحوظة... الألوان دي من تلت الوان فقط "احمر ازرق اصفر"
عملت الاورنج من الاحمر مع الاصفر.. والأخضر من الازرق مع الاصفر.. اللبني حطيت ازرق خفيف... الاسود الاحمر مع الازرق

نصيحة.. لو هتستخدمي الوان اكل البسي جوانتي عشان ايدك مش تتبهدل



تصميم مزرعة حيوانات

"المزرعة"
زي ما قولت قبل كدا ابني محب جدا للحيوانات لذلك اغلب الأنشطة بنستخدم فيها الحيوانات
دي المزرعة .. " من كرتون وغلفته بجوخ اخضر والشجرة بالفوم والبحيرة بقماش وحواجز بكرتون مغلف بفوم واللسور الخارجي اعواد الاسنان وحطيت فوق قطن وتحت فوم عشان مش يتعور ومجسمات حيوانات"
الهدف من النشاط:
هدف لغوي وهو معرفة اسماء الحيوانات الموجوده وكلمة "بحيرة" و "شجرة"
هدف ادراكي ادراك ان صوت كل حيوان مختلف وتقليد كل صوت
هدف ابداعي .. نتخيل قصة او اننا بنخلي البقرة تاكل من الزرع والحصان ياكل من الشجرة والبطة تعوم في البحيرة
تميم " سنة واربع شهور

30‏/3‏/2016

صورتان (2) - عرض الألبوم

معرفة السمكة "سنة واربع شهور"

حوض السمك
وانا بعرض على تميم فلاشات الشكل والظل "بدأنا بالشكل بس"
لاحظت انه مش قادر يميز السمكه
وكذلك كتاب اول مائة حيوان
فقررت اجيب مجسمات سمك واعمله حوض سمك عشان يميز السمكه
وبالفعل بفضل الله استمتع بالتجربة جدا وقدر يميز السمك
جبت علبة تلاجة كبيرة وحطيت فيها مايه ونقطة لون ازرق "عشان تحاكي البحر"
وحطيت السمك.. طبعا تميم زي اي طفل بيعشق المايه والترتشه 😂
وبعد ما خلصنا لعب بعد حوالي ساعه وبالعافية قدرت اقنعه اننا نشلها
"طبعا الاوضه كانت غرقت وهدومي وهدومه 😢"
ما علينا اهم حاجه انه استمتع
المهم.. استحمينا وقعدنا نتفرج على اليوتيوب على فيديوهات للسمك وهو بيعوم في البحر
بعدها جبت فلاش السمكه خليته يشوفه وكررت كلمة "سمكة"
وجبنا كتاب اول 100 وشاورت على اماكن السمك وبعدها خليته هو يشاور
وبفضل الله دلوقتي ميز السمك وعرفه كويس 🙌
ملحوظة
النشاط دا لغوي وحسي
1_ لغوي.. لانه عرف كلمة سمكه وكلمة بحر
2_حسي... لاننا لعبنا في المايه
تميم : سنة واربع شهور ونص 

كيفية تدريب الطفل دون العامين على معرفة الحيوانات

لسلام عليكم ورحمة الله وبركاته
بالنسبة للأمهات اللي سألوني الخطوات اللي بستخدمها في تدريب تميم على أصوات وأسماء الحيوانات والبرامج اللي بستخدمها
اولا: اليوتيوب.
دي لينكات لفيديوهات بيحبها وفرقت معاه كتير بفضل الله.
https://youtu.be/86AatYFhzwA
https://youtu.be/ZvfMMAljD3Q
https://youtu.be/wFHK3EP9urM
دي حلوه بس طويلة.. غالبا بستخدمها واحنا على البوتي وبيزهق قبل ما تخلص 😁
https://youtu.be/4y_advLIVww
ودا طبعا غير الافلام الوثائقية سواء عن الغابة بشكل عام... او كل فتره بنجيب حيوان ونقعد ندرب على اسمه وصوته ونشوف فيديوهات ليه "واحنا بنشوف الفيديو أحياناً بيبقى معانا المجسم بتاع الحيوان عشان يربط بينهم"
ثانيا: Applications .
الابلكيشن دا حلو وفي اكتر من اوبشن.. بالنسبة للحيوانات فانا كنت بستخدمه عشان يعرف اصواتهم وانا بقول اسمهم.. بس مش بعتمد عليه بشكل كبير لانه الافضل يعرف اشكال الحيوانات الحقيقة مش الكرتون
https://play.google.com/store/apps/details…
الابلكيشن دا رائع بردو في معرفة اصوات الحيوانات... والجميل فيه أن الصور حقيقية والاصوات.. ومقسمها "مزرعة بعدين غابة/ طيور /زواحف/حشرات"
https://play.google.com/store/apps/details…
دا بردو جميل بس مش بستخدمه كتير عشان الحيوانات كرتون... حلو في حاجتين.. بيقول أسم الحيوان وصوته... وفيه لعبه انه يقول الصوت وقدام الطفل تلت اختيارات هو يختار منهم دا صوت ايه
بفتحها لتميم وبعد ما بيسمع الصوت بقوله انا اسم الحيوان واسأله هو فين وهو يشاور "طبعا اوقات بيعرف يشاور و اوقات بيشاور غلط"
https://play.google.com/store/apps/details…
ثالثا: الكتب
كتاب اول 100 حيوان
كتاب plant earth
والكتب دي كنت اشتريتها أيام معرض الكتاب وكنت منزله بوست بيهم ممكن ترجعلهم.
رابعا: الكروت والفلاشات
كل فترة بختار تلت كروت واحطهم قدامه ونقعد نقول اسمائهم وبعدين اطلب منه يجيب ليا كذا "حيوان من التلاته" الحيوان اللي بيعرفه وبيختاره اكتر من مره صح بشيله واحط غيره حيوان جديد... واللي مش بيعرفه بسيبه مده اطول
خامسا: المجسامات
وطبعاً فصلنها.. حيوانات المزرعة لوحدها وحيوانات الغابة لوحدها
وبنستخدمها في القصص.. او تقسيم كبير وصغير.
سادسا: طول ما احنا في الشارع كل ما يقبلنا حيوان اشاور عليه واقول اسمه واسأله صوته ايه لو عرف اشجعه لو ماعرفش اقوله انا واخليه يقلدني.
طيب في أم هتقولي دا كتير اوي.. هجاوب بتلات نقط
1_الطفل بيزهق بسرعة.. فانت لازم يكون عندك اكتر من حاجه عشان تنوعي ليه.
2_الطفل في السن دا بيكون حساس لكل حاجه.. وكل تجربه بيستفيد منها شيئ مختلف.. التجارب الكتير بتنمي عنده اكتر من جانب وبتوسع مداركه.
3_مش لازم تعملي كل دا عشان تعلمي ابنك اسماء الحيوانات.. انا بعمل كل دا عشان ملاحظة شغف ابني بالحيوانات اكتر من اي حاجه تانيه.. فبشبع الشغف دا وفي نفس الوقت بدخله في كل التجارب والانشطه "حسي حركي لغوي...."
ممكن يكون شغف ابنك بالمواصلات... ممكن يكون بالأشكال الهندسية.. وممكن اي حاجه تانيه... تابعي ابنك وشوفي شغفه بإيع واشبعيه واس

أنشطة تميم 10 شهور

السلام عليكم ورحمة الله وبركاته
\أنشطة تميم في سن 10 شهور
1-التدريب على الجلوس منفردا والقيام دون مساعدة
2-أنشطة حسية شاط للشم.. كنت بجبله اكياس سليفان واحط بداخلها توابل بروائح مختلفة
3-سلة كنز الاصوات
4-سلة الكتز بحجام والوان وملامس مختلفة

انشطة حركية دقيقة سنة واربع شهور

السلام عليكم ورحمة الله وبركاته
دي بعض المهارات الحركية الدقيقة اللي عملتها مع تميم
1- الطين الصلصالي المنزلي
2-فتح وغلق علبة البيض ورص الكور فيها
3-اللضم
4-اكل الرمان "لتمرين على مسكة الكماشة"
وخليت كله باللون الاحمر عشان يميز الالوان
انا لسه مادخلتش في مرحلة تعليمة الالوان
لكن بس بحاول اوحد الالوان اد ما اقدر عشان يميزها 

‹

›

30‏/3‏/2016

6 صور - عرض الألبوم



‹

›

30‏/3‏/2016

6 صور - عرض الألبوم